Sochta Koi Aur Hai

Main Khayal Hun Kisi Aur Ka,
Mujhe Sochta Koi Aur Hai,
Sar e Aayina Mera Aks Hai,
Pas e Aaina Koi Aur Hai.

Main Kisi Ke Dast e Talab Me Hun,
To Kisi Ke Harf e Dua Me Hun,
Main Naseeb Hun Kisi Aur Ka,
Mujhe Maangta Koi Aur Hai.

Kabhi Laut Aaye To Na Puchhna,
Sirf Dekhna Bade Gaur Se,
Jinhe Raste Me Khabar Hui,
Ke Ye Rasata Koi Aur Hai.

Ajab Aitbar o Be Aitbari Ke
Darmiyan Hai Zindagi,
Main Qareeb Hun Kisi Aur Ke,
Mujhe Jaanta Koi Aur Hai.

Wahi Munsifon Ki Rivayate,
Wahi Faislo Ki Ibaarate,
Mera Jurm To Koi Aur Tha,
Par Meri Saza Koi Aur Hai.

Teri Roshni Meri Khad o Khal Se
Mukhtalif To Nahi Magar,
Tu Qareeb Aa Tujhe Dekh Lu,
Tu Wohi Hai Ya Koi Aur Hai.

Jo Meri Riyazat e Neem Shab Ko
Saleem Shub Na Mil Saki,
To Fir Iske Maani To Ye Hue,
Ke Yehan Khuda Koyi Aur Hai.